काठमाडौँ – ललितपुरको भनिमण्डलबाट पक्राउ परेका एक युवकसँग झन्डै १ करोड रुपैयाँ नगद बरामद भएको छ। प्रहरीले उनी अनलाइन गेमिङ र क्रिप्टो करेन्सी कारोबारमा संलग्न रहेको पाएको छ।
जिल्ला प्रहरी परिसर ललितपुरका एसएसपी श्यामकृष्ण अधिकारीका अनुसार, पक्राउ पर्ने युवक सिन्धुली पिपलभञ्ज्याङ घर भई हाल ललितपुर बस्ने २५ वर्षीय गौरव स्याङतान हुन्। उनलाई सोमबार साँझ पक्राउ गरिएको हो।
उपत्यका प्रहरी कार्यालय र ललितपुर प्रहरीको संयुक्त टोलीले उनको डेराबाट ९१ लाख ५० हजार नगद, १ थान पैसा गन्ने मेसिन र १ केजी ५ सय ग्राम गाँजा बरामद गरेको छ।
त्यसैगरी, अनलाइन गेमिङ र क्रिप्टो कारोबारमा प्रयोग गरिएको ११ थान मोबाइल फोन, आइप्याड र ल्यापटप समेत बरामद भएको प्रहरीले जनाएको छ।
हाल जिल्ला प्रहरी परिसर ललितपुरले उनको विषयमा थप अनुसन्धान अगाडि बढाएको छ।
